Interamente dedicata ai più piccoli e alle future generazioni, questa rubrica annovera alcune tra le più famose cantilene

Pare Ciccio 'ncoppa a votta,

chi 'o tira e chi 'o votte

Mbac Mbac ‘o calamaro,

a Madonna mmiez’’o mare,

Gesù Cristo a lu muntone

che spanneva ‘e fasciatore,

din din ‘o campaniello

s’è scetato ‘o bammeniello

mammà ‘nu poco ‘e pane,

figlio mio nun ‘nce n’è

e mo passa San Giuseppe

e te porta ‘a pagnuttella,

te ne vai a scola bella,

tutte nocche e ziarelle!

Nicola Niculecchia

e tirame ‘sta recchia

e tirame ‘stu pere

Nicola cumme fete.

E nonna nunnarella

‘o lupo è brutto

e ‘a pecurella è bella.

Pecurella mia

comme faciste a te fa mangià

a ‘stu lupo

che diciste?

Comm’è bello stu criaturo

va cuglienno rose e sciure,

chi ne coglie ‘nu panariello

e chi ne coglie ‘nu canestriello.

E purtamme ‘o bammeniello.

‘O bammeniello se scetaie

e vuleva ‘nu poco ‘e pane,

dicetta a mamma ‘nun ‘nce n’è

e va vire dinto ‘o canestriello

là ‘nce truove e passetielli.

Gesù Cristo nun ‘nce truvaie,

a Madonna s’addunicchiaie,

addunicchiammoce tutte quante,

ca mo venene li Re magi

cu zampogne e armonia

jammo cantanno l’Ave Maria.

E’ sunata ‘n’ora ‘e notte

e l’angiulillo p’‘a porta,

e Maria p’‘a casa;

‘o tristo jesce e ‘o buono trase

e Dio ‘nce guarda ‘o capo ‘e casa.

Nonna-nonna, nonna-nunnarella,

‘o lupo se magnaje ‘a pecurella…

tu, pecurella mia, comme faciste

quanno ‘mmocca a lu lupo te vediste?

Tu, pecurella mia, comme campaste

quanno ‘mmocca a lu lupo te truvaste?

Quanno è bello a ghji pe’ mare, 

‘a Madonna ‘ncopp’‘a nave; 

San Giuseppe a lu timone 

e Gesù Cristo pe’ patrone; 

l’angiulille pe’ marenare, 

quanno è bello a ghji pe’ mare.

Piso e pesillo, 

maccarune a chi si figlio 

e si figlio a Santu Martino 

cu na’ fella ‘e mulignana, 

saglie ‘ncielo cu ‘na scala, 

scala e scalella

tira tira 

‘o pere a tte!

Dimane è festa, 

‘o sorice menesta, 

‘a jatta porta ‘o vino 

e ‘o sorice cucina.

Harri! Harri! 

Cavalluccio 

e ghiammo 

a Vuttaiano 

accattà 

‘nu bello ciuccio. 

Harri! Harri!

Cavalluccio.

Chiove e jesce ‘o sole, 

tutt’’e vecchie fann’ammore, 

fann’ammore dint’’o tiano, 

tutt’’e vecchie ruffiane.

'Nce steva na vota 

nu viecchio e na vecchia, 

steveno ‘e casa 

areto a nu specchio…

Mo’ vene Natale

e renza e renza,

‘o putecaro te fa credenza.

‘o canteniere te mette ‘o vino,

facimme Natale

‘ngrazia ‘e Ddio.

Sega, sega

mastu Ciccio,

'na panella e nu' saciccio,

'o saciccio 'nce 'o mangiammo

e 'a panella 'nce astipamma,

'nce astipammo

pe' ll'anno che vene,

frisca l'anema 'e Manuele.

Manuele vuò murì?

'O tavuto t''o facc'io

e t''o faccio 'e scorza 'e noce,

Manué damme na' voce!

'Nce steva 'na vota

'nu monaco 'e voto,

jetto a Vico

e se mangiaie 'e ffiche,

jetto a Massa

e se mangiaie 'e passe,

jetto a Purtucariello

e se 'nchiaccaie 'o cazunciello,

jetto a mare

e so sciacquaie,

jetto 'nterra

e s'asciuttaie,

jetto 'a muorte

e s''o pigliaie

Jesce jesce corne

ca mammeta te scorna

te scorna 'ncoppa all'asteco

e faje 'e figlie mascule

Mo' vene Natale,

nun tengo denaro,

me fummo 'na pippa

e me vac''a cuccà.

Quanno è stanotte 

ca sparano 'e botte

me 'nfilo 'o cazone

e vaco a vedé.

'a Farfallina rossa

m''e murzecato 'o musso

'nu poco 'e vino russo

m''a fatto 'mbriacà

mannaggia 'a ccà

mannaggia 'a llà

mannaggia 'a pettula

'e mammà

Coscia picoscia

tiene 'e cosce mosce mosce

e sotto 'o mantesino

'nce sta' 'o scuogliero 'e Margellina

Marì, Marì, Marì

porta a bevere 'e galline

'e galline fanno ll'ove

'e Maria 'a mariola